नागपूर : मराठा समाजाला ओबीसीतून आरक्षण नको, तर वेगळ्या प्रवर्गातून आरक्षण द्या, अशी भूमिका नागपूरच्या भोसले घराण्याचे वंशज मुधोजी राजे भोसले यांनी स्पष्ट केली आहे. मराठा समाजाला शिक्षण आणि नोकरीत आरक्षण हवे आहे, मात्र ते ओबीसीच्या कोट्यातून देण्याची गरज नाही, असं ते म्हणाले.
जरांगे आंदोलनाला शुभेच्छा, पण…
मुधोजी राजे भोसले म्हणाले, “जरांगे पाटील यांच्या आंदोलनाला आम्ही शुभेच्छा देतो. मात्र ओबीसीतून मराठा समाजाला आरक्षण देण्यास आम्ही ठाम विरोध करतो.”
फडणवीसांच्या कामाचं कौतुक
ते पुढे म्हणाले, “देवेंद्र फडणवीस यांनी मुख्यमंत्रीपदाच्या काळात मराठा आरक्षणासाठी जे काम केलं, ते खरंच कौतुकास्पद आहे. आता न्यायालयात टिकेल असं आरक्षण मराठा समाजाला हवं आहे, आणि त्यावरच मराठा समाज ठाम आहे.”
“आम्ही देणारे आहोत, हिसकावणारे नाही”
मुधोजी राजे भोसले यांनी मराठा समाजाच्या भूमिकेबाबत सांगितलं की, “आम्ही मराठा आहोत, त्याचा अभिमान आहे. आम्ही देणारे आहोत, कोणाचा अधिकार हिसकावून आरक्षण घेण्याचा प्रश्न येत नाही.”