नाट्य महोत्सवातून उदयोन्मुख कलावंतांना संधी – अजित पवार

पिंपरी, पुणे | दि. २० सप्टेंबर २०२५
पिंपरी चिंचवड शहरात आयोजित “रंगानुभूती : पूर्वरंग ते उत्तररंग नाट्य प्रयोग कला महोत्सव २०२५” ला रसिक प्रेक्षकांचा उत्स्फूर्त प्रतिसाद मिळत आहे. या महोत्सवाद्वारे अनेक उदयोन्मुख कलाकारांना आपली कला सादर करण्याची संधी मिळाली असून, शहराच्या सांस्कृतिक वैभवात भर पडत असल्याचे मत उपमुख्यमंत्री तथा पुणे जिल्ह्याचे पालकमंत्री अजित पवार यांनी व्यक्त केले.

सांस्कृतिक ओळख निर्माण करणारे पिंपरी चिंचवड

अजित पवार म्हणाले,

“पिंपरी चिंचवडची आता औद्योगिक ओळख सोबतच सांस्कृतिक ओळखही निर्माण झाली आहे. शहरातून अनेक कवी, लेखक, साहित्यिक, अभिनेते घडले आहेत आणि पुढेही घडत राहतील. सरकार म्हणून कला, साहित्य, संस्कृती यांना शक्यतो सर्व मदत करण्याचा आमचा प्रयत्न आहे.”

महापालिकेने या महोत्सवाला मदत करून शहरातील कला, संस्कृती जोपासण्यास हातभार लावल्याबद्दल त्यांनी समाधान व्यक्त केले.

भव्य उद्घाटन समारंभ

या महोत्सवाचे औपचारिक उद्घाटन अजित पवार यांच्या हस्ते करण्यात आले. यावेळी विधानसभेचे उपाध्यक्ष अण्णा बनसोडे, महापालिका आयुक्त शेखर सिंह, अतिरिक्त आयुक्त प्रदीप जांभळे पाटील, उपायुक्त पंकज पाटील, तृप्ती सांडभोर, राज्य अनुसूचित जाती-जमाती आयोगाचे सदस्य ॲड. गोरक्ष लोखंडे, ललित कला केंद्र प्रमुख प्रवीण भोळे आदी मान्यवर उपस्थित होते.

विविध राज्यांतील कलावंतांचा सहभाग

महोत्सवात महाराष्ट्रासह राजस्थान, केरळ, पश्चिम बंगाल, कर्नाटक या राज्यांतील कलावंतांनी सहभाग घेतला आहे. शहरातील प्रेक्षकांना विविध भाषांतील नाट्यप्रयोग पाहण्याची अनोखी संधी मिळत आहे.

स्थानिक कलाकारांचा गौरव

पिंपरी चिंचवड परिसरातील नाट्य आणि सांस्कृतिक क्षेत्रातील संस्थांना “प्रयोग कला सन्मान” देऊन गौरविण्यात आले. यामध्ये दिशा सोशल फाऊंडेशन, टेल्को कलासागर, अखिल भारतीय नाट्य परिषदेची शाखा, अथर्व थिएटर, कलापिनी, नाटक घर, द बॉक्स, आसक्त, महाराष्ट्र कल्चरल सेंटर सुदर्शन रंगमंच, संस्कार भारती या संस्थांचा समावेश होता.

सातत्याने होणारा महोत्सव

महापालिका आयुक्त शेखर सिंह यांनी सांगितले की, शहरात २०१३ पासून कला-क्रीडा धोरण राबवले जात आहे आणि स्थानिक कलाकारांना नेहमी प्रोत्साहन दिले जाते.

“दरवर्षी अशाप्रकारचा नाट्यमहोत्सव आयोजित केला जाईल, जेणेकरून शहरातील आणि राज्यातील कलाकारांना व्यासपीठ मिळेल,” असे त्यांनी नमूद केले.

सूत्रसंचालन आणि आभार प्रदर्शन

कार्यक्रमाचे सूत्रसंचालन मिलिंद बावा आणि तेजस्विनी गांधी