सातारा: मुंबई उच्च न्यायालयाच्या कोल्हापूर सर्किट बेंचचे उद्घाटन रविवारी (दि.17) शानदार आणि ऐतिहासिक ठरले. या उद्घाटन सोहळ्यात सर्वोच्च न्यायालयाचे सरन्यायाधीश भूषण गवई यांनी सर्किट बेंचच्या इमारत निर्मितीत राज्याचे सार्वजनिक बांधकाम मंत्री शिवेंद्रराजे भोसले यांचे काम गिनीज बुक ऑफ वर्ल्ड रेकॉर्डमध्ये नोंद घेण्यासारखे असल्याचे गौरवोद्गार काढले.
मुख्यमंत्री देवेंद्र फडणवीस यांनी देखील शिवेंद्रराजेंच्या कामगिरीचे विशेष कौतुक केले.
शिवेंद्रराजेंच्या कर्तृत्वाला मान्यता:
सर्वोच्च न्यायालयाचे सरन्यायाधीश भूषण गवई म्हणाले, “महाराष्ट्राच्या सार्वजनिक बांधकाम विभागाचे मंत्री शिवेंद्रराजे भोसले आणि त्यांच्या संपूर्ण टीमने जे असंभव होते ते शक्य करून दाखवले आहे. 20 ते 25 दिवसांच्या कालावधीत हायकोर्टाला साजेशी आणि सुंदर अशी इमारत तयार केली आहे. मी तर म्हणतो, हे काम गिनीज बूक ऑफ वर्ल्ड रेकॉर्डमध्ये नोंद करायला हवे.” गवई यांनी शिवेंद्रराजे भोसले आणि त्यांच्या टीमचे मनापासून अभिनंदन केले.
मुख्यमंत्री आणि उपमुख्यमंत्र्यांचे कौतुक:
मुख्यमंत्री देवेंद्र फडणवीस यांनीदेखील शिवेंद्रराजेंच्या कामगिरीची दखल घेतली. ते म्हणाले, “शिवेंद्रराजे भोसले यांचे केलेले काम अत्यंत उठावदार आहे. त्याचप्रमाणे, मुख्य अभियंता अतुल चव्हाण यांचेही अभिनंदन करतो.”
उपमुख्यमंत्री एकनाथ शिंदे म्हणाले, “कोल्हापूर सर्किट बेंचच्या इमारतीचे काम अत्यंत उत्तम झालं आहे. हेरिटेज लुक ठेवून ही इमारत बनवली गेली आहे, आणि यासाठी शिवेंद्रराजे भोसले व त्यांच्या टीमचे मनापासून अभिनंदन.”
शाबासकीमुळे जोमाने काम करण्याची प्रेरणा:
शिवेंद्रराजे भोसले यांनी सरन्यायाधीश भूषण गवई, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांचे आभार मानले. ते म्हणाले, “या शाबासकीमुळे मला अधिक जोमाने आणि जिद्दीने चांगले काम करण्याची प्रेरणा मिळाली आहे. यापुढेही जनतेच्या हिताचे काम प्रामाणिकपणे केले जाईल.”
कोल्हापूर सर्किट बेंचच्या इमारतीच्या उद्घाटन सोहळ्यात शिवेंद्रराजे भोसले यांच्या कर्तृत्वाचा मोठ्या प्रमाणावर गौरव झाला. त्यांनी सार्वजनिक बांधकाम विभागाचे काम आणि शिवेंद्रराजे भोसले यांचे नेतृत्व निश्चितपणे गिनीज बुक ऑफ वर्ल्ड रेकॉर्डसारख्या ऐतिहासिक यशाने ओळखले जाईल.
